Mat 15 | UBUKALA | STEP | Kanu kinie Parisi ye mare kinie, Pulu Yemonga ungu manemanga pulume pilku mane siringi ye mare kinie eno Jerusalleme munduku siye kolko Yesusi molorumune ongo yu walsiku pilkulie ningendo:

Matthew 15

15:1-20 Melema Kake Telemomonga Pulumu Kinie Melema Kalaro Molemomonga Pulumu-Selonga Ungu Mare ^{▼▼15:1-20 Ungumu*Mako 7:1-23.}

15:1-9 Pulu Yemonga Ungu Manema Olandopa, Anda Kolepalimenga Ungu Manema Maniendopa, Ungu Te ^{▼▼15:1-9 Ungu*akumunge 15:1-3a Mako 7:1-5, 15:3b-6 Mako 7:9-13, 15:7-9 Mako 7:6-8. 15:3-9 inie anjokondo 16:5-12, 23:2-3.} (15:1-20 pali kanani.)

1 Kanu kinie Parisi ye mare kinie, Pulu Yemonga ungu manemanga pulume pilku mane siringi ye mare kinie ^{▼▼15:1*bokumunge alsena anjokondo “11. Farisi”, “41. saveman”.} eno Jerusalleme munduku siye kolko Yesusi molorumune ongo yu walsiku pilkulie ningendo: 2 “Olionga anda kolepalimene “Teaa.” niringi ungu manemo nu lombili andolimene nambemune pulue tolemeleye? ⸤Anda kolepalimene “Teaa.” niringi mele mimi sipu pilipulie olione kíme kulumiye tolemolo mele⸥ enonga kíme aku siku kulumiye naa toko langi we nolemele kanumu.” niringi.

3 Yesusini topondopa nimbendo: “Enone kepe enonga anda kolepalimene “Teaa.” niringi mele mindi pilku liku tengendo Pulu Yemonga ungu manema nambemune pulue tolemeleye? 4 Akumunge Pulu Yemone nimbendo:

“Aminieli lanielinge ungume pilku liku,
liku awi siku teaa.” ^{▼▼15:4*Wendo Oringi 20:12, UnguManema 5:16.} nimbe
“Yembo tene yunge anumundu molo lapando
ungu te nimbe kenjipe iri tomu liemo
kanu yembomo toko kondangi.” ^{▼▼15:4**Wendo Oringi 21:17, LLipai 20:9.}
nirimu kanumu. 5 Nalo eno yemane ningendo: “Yembo tene yunge anumu lapaselondo nimbendo: “Nane elo mele mare lipu tapondopo silkema koronga ‘Pulu Yemo simbo.’ nimbu panjerindu kanumunge elo manda naa lipu tapondopo simbo.” nimbé kinie 6 ⸤aku sipe nimbemonga⸥ yunge lapa imbi lipe ola mundundumbe ungu te naa pemba.” nilimele. Aku siku nilimele ungumuni ‘Anda kolepalimene mane siringi ungume olandopa.’ ningu ‘Pulu Yemone nirimu ungumu uluri molo. Manie pupili.’ nilimele.

7 “Eno ⸤ungu manema pilku mane silimele yema kinie Parisi yema kinie⸥ eno topele mapele toli yema molemele! ^{▼▼15:7*bokumunge alsena anjokondo “47. tupela maus”.} Pulu Yemone ungu umbu tondorumume pilku yemboma nimbe sirimu ye Aisayane enondo nirimu mele papu nirimu. ⸤Enone kinié telemele mele yuni ou nimbe Pulu Yemonga bokune torumu molemo mele isipe:⸥

8 ⸤Pulu Yemone nimbendo:⸥

“Kanu yemboma enonga keremane na kapi ningu
‘Ye awili olandopamo.
‘Nu lipu awi silimolo.’ ningu
na imbi liku ola mundundulimele nalo
enonga konopume kinie nanga konopumu kinie
telune naa pulimo. Lupe lupe pelemo.
9 Enone ‘Nanga imbi

lipu ola mundundemili.’ ningu
na we popo toko kapi nilimele.
Mana yembomane mane silimele ungume mindi
mane sikulie
‘Iungu manema Pulu Yemone
“Teaa.” nilimo ungu manema.’
ningu pilku liku telemele,
akumunge na sike popo tonge kinie
uluri naa temba.” ^{▼▼15:8-9*Aisaya 29:13.}
nirimu kanumu.” nirimu.

15:10-20 Ulu Marene Yemboma Tepa Kalaro Mondondolemomanga Ungu Te ^{▼▼15:10-20 Ungumu*Mako 7:14-23.} (15:1-20 pali kanani.)

10 Aku nimbelie Yesusini maku toko moloringi yembomando “Na moliona waa.” nimbelie enondo nimbendo: “Nane ⸤aku nikirumunge ^{▼▼15:10*Ya 15:1-9 akumu.} ungu te⸥ nimbo tekero ungumu komu tendeko ungumunge pulumu pilku kondayo. 11 Yembomanga kangine ulsukundu lepalie kerena pupe olona suku pulimo meltene ⸤Pulu Yemo manda popo tonge aulkemo pipi silimo⸥ kalaro te manda naa mondolemo. Yembomanga konopune sukundu pepalie wendo olemo ulumene mindi yemboma kalaro mondolemo.” nirimu.

12 Aku nirimu pilkulie niringimuni, yu lombili andolime yu molorumune ongolie ningendo: “Nu aku siku nikinu mele pilkulie Parisi yemane paa pilku keri piliengi mele nu pilkinuye?” niringi.

13 Nalo Yesusini topondopa ⸤ungu iko topa Parisime moloringi mele nimbelie⸥ nimbendo: “Nanga mulu koleana molemo Lapamone umbu naa panjerimume pali pulu akumbe. ^{▼▼15:13*inie yakondo 13:29-30,40-42.} 14 Iyemane nilimele mele konopu kimbu siku naa pilku molangi. Eno mongo keri lielimene ⸤mongo keri lielime⸥ aulke liku ora silimele yema molemele. Mongo keri lieli ye tene mongo keri lieli ye te aulke te lipe ora sipe ki ambolopa memba pumbe kinie elo peaselo kombune topa manie mundumbe.” ^{▼▼15:14*Yembomane Aisaya 9:16, Mallakai 2:8 molemo mele pilieringi unguselo pilipelie Yesusini aku sipe nirimu lemo. Inie anjokondo 23:16,24, LLuku 6:39, Jono 13:16, Romo 2:19.} nirimu.

15 ⸤Kalaro molemomonga ungu ikomo aku sipe torumu kinie pilipelie⸥ Pitane yundu nimbendo: “Aku ungu ikomonga pulumu nambolkanje? Ningu para sie.” nirimu kinie

16 Yesusini enondo nimbendo: “Kinié kepe naa pilkimiliye? 17 Yembo tenga kangine ulsu lepalie kerena pulimo melte olona suku pupe ulsu omba le-murune kamu pulimo mele naa pilkimiliye? 18 Kerena sukundu pulimo melemane uluri naa telemo kanumu. Ulu kerime ou konopuni pilkulie pe kamu wendo olemomonga konopune pepalie kerena wendo olemo kanu melemane mindi ⸤Pulu Yemo popo tomba aulkemo pipi silimo⸥ kalaro te mondolemo. Kanu melema isipe: Konopuni ulu kerime pilimele, yemboma toko kondolemele, ambo ye pulime molo ye ambo lilime yembo lupema kinie ulu kerinele telemele, wa ulu kerinele lupe lupema andoko telemele, wa nolemele, kolo toko yemboma kote tendelemele, ‘Yemboma pipili kolko molko kenjengi!’ ningu ungu bulkundu nindilimele, ulu pulu akume pilku telemele. ^{▼▼15:18-19*Gallesia 5:19-21, Epesasi 4:31, Kollosi 3:8.} 20 Aku telemele ulu akumene yemboma ⸤Pulu Yemonga kumbikerena punge aulkemo pipi silimo⸥ kalaro te mondolemo. Nalo ki ou naa kulumiye toko langi we sumbi siku nolemele ulu pulumuni ⸤yembo tenga konopune suku⸥ kalaro te naa mondolemo.” nirimu. ^{▼▼15:17-20*inie anjokondo 23:25-26.}

15:21-28 Kenane Ambo Tene ‘Yesusini Ulu Tondolo Te Manda Temba.’ Nimbe Tondolo Mundupe Pilierimu Temanemo ^{▼▼15:21-28 Temanemo*Mako 7:24-30.}

21 Kanu kinie Yesusi molorumu kolea ⸤Geneserete⸥ ^{▼▼15:21*inie yakondo 14:34.} mundupe siye kolopa ⸤Juda yemboma moloringi kolea Gallilli disiriki ulsukundu⸥ kolea awili Taya kinie Saidonoselo lierimu koleana sukundu purumu. 22 Akune purumu kinie kolea Kenane ambo te ^{▼▼15:22*Yu Kenane ambomo liemo yu Pulu Yemonga Juda yembomanga ambo te paa naa molorumu kanumu.} molorumu, yu wendo omba tondolo ru nimbelie nimbendo: “Awilimu, Ye Nomi Kingi Depisini Kalopa Lsimu Yemo, ^{▼▼15:22**bokumunge alsena anjokondo “32.1. Pikinini Bilong Devit”.} nanga ambolamo kuru te konopune sukundu molopa yu tondolo ambolemo kene nuni na kondo kolou!” nirimu. 23 Nalo Yesusini yundu ungu te topondopa naa nirimu.

Kanu kinie yu lombili andolimene ongo yundu ningendo: “Ambomone nu walsilipe olio lombili okomomo ⸤siye tekemo⸥ kene ‘Anjo pupili.’ ni.” niringi.

24 ⸤Ambomo yu ambo lupe, Juda ambo te molo, nimbe kanopalie⸥ Yesusini ⸤yundu⸥ nimbendo: “Pulu Yemone na Isirele yembo talapemonga kongi sipisipi talopa lemele mele ^{▼▼15:24*bokumunge alsena anjokondo “44.2. sipsip”.} molemele yemboma molemelena mindi lipe mundorumu kanumu. Yembo talape lupema molemelena lipe naa mundorumu.” nirimu.

25 Aku sipe nirimu kinie pilipelie ambomo omba yunge kumbikerena koporongo langopa ma kanopalie nimbendo: “Awilimu, na liku tapondou.” nirimu.

26 Aku nirimu kinie Yesusini topondopa ⸤ungu iko te topalie⸥ nimbendo: “Ambolangomanga langime lipu owama simolo kinie kapola naa temba.” nirimu. ^{▼▼15:26*ungu pulu te Mako 7:27*.}

27 Ambomone nimbendo: “Awilimu, sike nikinu nalo owamane kepe enonga pulu yembomanga langi pundu manie pulimoma liku nolemele kanumu.” nirimu.

28 Kanu kinie Yesusini yundu nimbendo: “Ambomo, nu manda tembo mele tondolo munduku pilino lemo kene mawa tekeno mele aku sipe wendo opili.” nirimu kinie yuni aku sipe nirimu mele aku enamonga ambomonga lemenu konde pupe kapola molorumu.

15:29-31 Yesusini Yembo Kuru Torumume Tepa Konde Lsimu Temanemo ^{▼▼15:29-31 Temanemo*Mako 7:31-37; inie yakondo 4:23-5:1.}

15:29-39 Langi Naa Lepa Kolea Ku Lieli Tenga Yesusini Ye Po Tausini Kinie Ambo Ambolangoma Kinie Langi Sirimu Temanemo ^{▼▼15:29-39 Temane*akumunge 15:32-39 Mako 8:1-9. Ye pape tausininge temanemo inie yakondo 14:13-21.}

29 Kanu kinie Yesusi kanu koleamo mundupe siye kolopa nomu Gallilli kélona ⸤aulke te lierimune⸥ omba pupe ma pangi tenga ola pupe manie molorumu.

30 Kanu kinie yu molorumune yembo paa awisili oringi.

Kimbu keri lierimu-ne aulke mimi siku naa andoringi yemboma kinie,

mongo keri lierimu yemboma kinie,

kimbu ki karaye terimu yemboma kinie,

ungu manda naa niringi yemboma kinie,

aku sipe kuru lupe lupe torumu yembo awisili

mengo ongo yu molorumune nondoko noseringi kinie

yuni eno tepa konde lsimu.

31 Ungu naa niringi yemboma ungu niringi;

kimbu ki karaye terimu yembomanga kimbu kime kelepa sumbi sipe angilierimu;

kimbu keri lierimu-ne aulke mimi siku naa andoringi yemboma kapola andoringi;

mongo keri lierimu yemboma mongone melema kanoringi;

aku sipe ulu tondoloma wendo orumu kinie kanokolie we maku toko moloringi yembomane paa konopu awisili liku munduku, Pulu Yemo eno Isirele yemboma nokorumu popo toringi Pulu Yemo kapi ningu imbi liku ola mundundoringi.

32 Kanu kinie Yesusini yu lombili andolimendo “Na moliona waa.” nimbelie enondo nimbendo: “I yembo maku toko molemelema na kondo tekemo. Wale yepoko na-kinie molongi, pe kinié ga nonge te naa lemo. Eno langi naa nongo we punge kinie aulkena kimbu ki pange-mange tepa, topa ne munde ya munde temba kene ‘Eno engele tepa pepili ulkendo paa.’ naa nimbo.” nirimu.

33 Aku nirimu kinie pilkulie yu lombili andolimene ningendo: “⸤Sike nikinu nalo⸥ ikolea ku lieline molemolo. Iyembo paa awisili manda nonge mele pillawa kaloli tena lembana lipu simoloye?” niringi.

34 Yesusini enondo “Pillawa kaloli nambeko nosikimiliye?” nimbe walserimu kinie

enone “Pillawa kaloli yepoko pakera kinie oma koltalo kinie nosikimulu.” niringi.

35 Kanu kinie yuni maku toko moloringi yembomando “Manie molaa.” nimbelie, 36 pillawa kaloli yepoko pakera kinie omama kinie lipe Pulu Yemo kinie “Ange.” nimbe, langi akume pike lepa yu lombili andolime sirimu kinie enone yemboma moke teko siringi. 37 Yemboma pali nongo keri pilieringi. Pe langi kakena lierimume lombili andolimene liku wale basiketemanga lakilieringi, wale awili yepoko pakera peke lierimu. 38 Ye po tausinini aku langime noringi. Ambo ambolangoma kinie pea langi noringi.

39 Kanu kinie Yesusini maku toko moloringi yembomando “Ulkendo paa.” nimbelie nirimumuni, nona andoli sipi tenga suku pupe, ⸤nomune nekendo⸥ kolea Makatane ^{▼▼15:39*Aku koleamo lierimu mele mimi siku naa pilimele. ‘Makatane akumu taono te.’ konopu lemele. Mako 8:10 ‘Dallamanuta’ nimbe molemo akumu kolea telumu imbi talonje, molo aku koleamo kinie Makatane kinie taono mare lierimu kolea tenje.’ ningu pilimele.} purumu.

Matthew 15

15:1-20 Melema Kake Telemomonga Pulumu Kinie Melema Kalaro Molemomonga Pulumu-Selonga Ungu Mare ▼▼15:1-20 Ungumu*Mako 7:1-23.

15:1-9 Pulu Yemonga Ungu Manema Olandopa, Anda Kolepalimenga Ungu Manema Maniendopa, Ungu Te ▼▼15:1-9 Ungu*akumunge 15:1-3a Mako 7:1-5, 15:3b-6 Mako 7:9-13, 15:7-9 Mako 7:6-8. 15:3-9 inie anjokondo 16:5-12, 23:2-3. (15:1-20 pali kanani.)

15:10-20 Ulu Marene Yemboma Tepa Kalaro Mondondolemomanga Ungu Te ▼▼15:10-20 Ungumu*Mako 7:14-23. (15:1-20 pali kanani.)

15:21-28 Kenane Ambo Tene ‘Yesusini Ulu Tondolo Te Manda Temba.’ Nimbe Tondolo Mundupe Pilierimu Temanemo ▼▼15:21-28 Temanemo*Mako 7:24-30.

15:29-31 Yesusini Yembo Kuru Torumume Tepa Konde Lsimu Temanemo ▼▼15:29-31 Temanemo*Mako 7:31-37; inie yakondo 4:23-5:1.